Policia ka sekuestruar ditën e djeshme në qytetin e Pogradecit pasuritë e paluajtshme të një çifti që kapnin vlerën 1 mln euro.
Falë operacionit “Transferta” u arrestua edhe çifti i bashkëshortëve. Ata janë Almanda Durollari dhe bashkëjetuesi i saj italian, Francesko Cocilovo. Çifti fitonte para nëpërmjet aktivitetit kriminal dhe paratë i investonin në Shqipëri.
Atyre ju janë sekuestruar 2 apartamente banimi në Pogradec, me sipërfaqe 175 m2; 4 apartamente banimi në Tiranë, me sipërfaqe 420 m2; dhe 1 njësi shërbimi në Tiranë, me sipërfaqe 106.5 m2; të cilat si burim të ardhurash kishin aktivitetin kriminal.
Ata kishin transferuar 700 mijë euro nga Italia dhe i kishin regjistruar në emrin e 77-vjeçares Vergjinush Durollari, nënës së shqiptares.
Shtetasi italian deklaronte se të ardhurat i fitonte nga një fabrikë rrobash, ndërsa paratë janë transferuar në Shqipëri me anë të një kompanie nga Panamaja.
Almanda Durollari dhe Cocivolo janë proceduar më parë nga Autoritetet Gjyqësore Italiane, nga Guardia di Finanzia e Comos, për veprat penale të mashtrimeve financiare, falsifikimit dhe shitjes së produkteve me shenja false.
Nga hetimi ka rezultuar se të dy këtyre shtetasve, Guardia di Finanza, iu ka sekuestruar rreth 2.388.611 Euro në Itali, të cilat dyshohen se rrjedhin nga aktiviteti i paligjshëm i tyre.
