Arben Ahmetaj në një deklaratë për mediat ka reaguar për postin e lartë, që i besoi kryeministri Edi Rama në mandatin e tretë qeverisës.
Ahmetaj është emëruar zëvendëskryeministër, duke zëvendësuar në këtë post Erjon Braçe, që njoftoi largimin nga detyra pak ditë më parë, përmes një postimi në rrjetinn e tij social ‘Facebook’, ku shkruante ‘çdo gjë e ka një fund’.
Ahmetaj është shprehur se ky post është përgjegjësi e madhe, duke shtruar se do të vijojë me projektin e Rilindjes.
“Me shumë përgjegjshmëri dhe me shumë emocion, nuk kam pse ta fsheh se është përgjegjësi e madhe. Dhe vazhdojmë projektin e Rilindjes me kryeministrin Rama”, ka deklaruar Ahmetaj.
Kujtojmë se ai ka një karrierë të gjatë në administratën publike në disa pozicione të rëndësishme, ndërsa angazhimi i tij politik zë fill me Lëvizjen Studentore të vitit 1990. Nga data 13 Dhjetor 2019 Arben Ahmetaj është emëruar Ministër i Shtetit për Rindërtimin, pas një viti në drejtimin e Komisionit Parlamentar të Ekonomisë dhe Financave.
Arben Ahmetaj mbajti detyrën e Ministrit të Financave të Republikës së Shqipërisë përgjatë shkurt 2016 – Janar 2019, pasi shërbeu si Ministër i Zhvillimit Ekonomik, Turizmit, Tregtisë dhe Sipërmarrjes përgjatë periudhë s shtator 2013- shkurt 2016.
Në vitet 2004- 2005 mbajti postin e Zëvendës Ministrit në Ministrinë e Integrimit Europian, ndërsa në periudhën 2003-2004 atë të Zëvendës Ministrit në Ministrinë e Energjisë dhe Industrisë. Z. Ahmetaj ishte Drejtor i Përgjithshëm në Drejtorinë e Përgjithshme të Tatimeve në vitin 1998-1999 ndërsa më herët shërbeu si Drejtor i Kabinetit në Ministrinë e Financave dhe përgjegjës për marrëdhëniet Ndërkombëtare, anëtar i grupit të koordinimit të negociatave me Fondin Monetar dhe për konkretizimin e marrëveshjes post konfliktuale me ESAF. Arben Ahmetaj është anëtar i Partisë Socialiste të Shqipërisë. Në zgjedhjet e qershorit 2017, ai u zgjodh deputet i Qarkut Tiranë, duke përfaqësuar Bashkitë Rrogozhinë dhe Kavajë. Në vitin 2013 u zgjodh deputet në Qarkun e Gjirokastrës, ndërsa nga viti 2009 përfaqësoi qarkun e Korçës në Kuvendin e Shqipërisë. Është anëtar i Kryesisë së Partisë Socialiste.
