Një ngjarje historike vjen nga Kalabria, ku për herë të parë një rajon në Itali nis transmetime të dedikuara në gjuhën arbëreshe. RAI Calabria do të prodhojë programe që synojnë të ruajnë dhe të promovojnë trashëgiminë gjuhësore e kulturore të komuniteteve arbëreshe, një pasuri e rrallë që ka mbijetuar për shekuj në mbi pesëdhjetë komuna të rajonit.
Marrëveshja u arrit mes Presidencës së Këshillit të Ministrave, Departamentit për Informacionin dhe Botime dhe RAI-t, në kuadër të Kontratës së Shërbimit Publik që njeh dhe mbron të drejtat e pakicave gjuhësore historike.
“Programimi do të fillojë në mesin e shtatorit dhe do të zgjasë trembëdhjetë muaj, duke synuar promovimin e trashëgimisë kulturore arbëreshe. Ne jemi rajoni i parë me statut të zakonshëm që prodhon programim në një gjuhë minoritare, dhe kjo më bën veçanërisht krenar si kalabrez. Jam i kënaqur me punën e bërë, dhe do të jetë një angazhim i vazhdueshëm për Kalabrinë, por edhe për RAI-n, i cili edhe një herë e kryen rolin e tij si televizion i shërbimit publik në maksimum.”, u shpreh Massimo Fedele, drejtor i zyrës rajonale të RAI Calabria.
Nga ana e saj, ambasadorja e Shqipërisë në Itali, Anila Bitri Lani, e përshëndeti këtë hap të madh:
“Ky është një hap i rëndësishëm jo vetëm për popullin arbëresh, por për shoqërinë italiane në tërësi dhe për komunitetin shqiptar dhe italo-shqiptar. Ai përfaqëson jo vetëm komunikimin, por edhe mbrojtjen dhe vlerësimin e një trashëgimie unike gjuhësore dhe identitare. Ai forcon ndjenjën e përkatësisë, u përcjell kujtimin e paraardhësve brezave të rinj dhe bashkon shqiptarët dhe italo-shqiptarët brenda universit arbëresh.”
Transmetimet televizive do të nisin më 21 shtator, çdo të diel, me emisione të përqendruara tek komunitetet arbëreshe të rajonit. Ndërsa në radio, nga e hëna deri të premten, do të ofrohet një program i pasur që eksploron historinë, kulturën dhe gjuhën arbëreshe, me përsëritje në fundjavë.
Ky projekt i jep zë një trashëgimie që për shekuj ka mbajtur gjallë lidhjen mes Italisë dhe Shqipërisë, duke e kthyer arbërishten në një urë të fortë mes të shkuarës dhe së ardhmes.
