Shkrimtari Ismail Kadare është dekoruar mbrëmjen e sotme me titullin “Oficer i Madh i Legjionit të Nderit” prej presidentit francez Emmanuel Macron. Ky është titulli më i lartë që mund të jepet nga shteti francez për një shkrimtar dhe artist si Ismail Kadare.
Ceremonia e dekorimit u mbajt në Pallatin e Brigadave në Tiranë. Aty ishin të pranishëm edhe kryeministri Rama, si dhe shkrimtarë dhe artistë të tjerë së bashku me familjen e Kadares.
Në fjalën e tij Macron vlerësoi figurën e Kadares si shkrimtar dhe personalitet në art. Gjithashtu ai vuri në dukje qëndrimin e Kadares gjatë viteve të diktaturës ku diti t’i rezistojë rrymave komuniste në art dhe letërsi. Franca gjithmonë ka qenë vendi ku Kadare është frymëzuar për letërsinë e tij.
Dhe më pas dihet largimi i tij nga Shqipëria në vitin 90’ drejt Francës, e cila ndikoi që studentët të kryejnë protestat e para në 40 vite në vendin tonë.
