Një shtetas 41-vjeçar nga Maqedonia e Veriut është vënë në pranga nga Policia shqiptare, pasi ishte shpallur në kërkim ndërkombëtar nga autoritetet austriake për disa vepra të rënda penale.
Operacioni u zhvillua nga strukturat e Drejtorisë së Forcës së Posaçme Operacionale, si pjesë e aksionit të koduar “Operacionalja 54”. Arrestimi u bë në Tiranë, ku u lokalizua dhe u ndalua shtetasi Musli Aslani, lindur dhe banues në Shkup.
Sipas njoftimit zyrtar, autoritetet e drejtësisë në Austri kanë lëshuar një urdhër arresti për Aslanin, për akuzat: trafikim droge, kërcënim i rrezikshëm, zhvatje e rënduar, dhe plagosje, vepra për të cilat Kodi Penal Austriak parashikon një dënim maksimal deri në 20 vite burg.
Gjatë momentit të ndalimit, policia i sekuestroi një sasi të lëndës së dyshuar narkotike kanabis, e cila u mor si provë materiale.
Interpol Tirana ka nisur procedurat për ekstradimin e 41-vjeçarit drejt Austrisë, në bashkëpunim të ngushtë me autoritetet e këtij shteti.
