Mbrëmjen e të shtunës rreth orës 21:40, një ngjarje e rëndë tronditi Laçin, pasi katër persona, mes tyre Kreshnik Tusha, të veshur si efektivë policie mbërritën në sheshin e një hoteli “AA”, në autostradën Laç-Mamurras ku pati një përplasje me armë.
Për pasojë, ndërroi jetë në vendngjarje, Bujar (Hasani) Lika, 37 vjeç dhe u plagosën Paulin Gjergji, 53 vjeç dhe Kreshnik Tusha 21 vjeç.
Gjergji u transportua në spitalin e Traumës ku vdiq si pasojë e plagëve të marra, ndërsa Tusha me ndihmën e bashkëpunëtorëve shkoi në shtëpinë e tij, që të ndërrohej, hoqi uniformën e Policisë së Shtetit dhe i veshur civil, me ndihmën e familjarëve shkoi në spitalin e Kurbinit.
Më pas, u transportua drejt Traumës, ku po merr ndihmën e nevojshme mjekësore, pasi ka marrë një plumb në këmbë.
Së fundmi, Dosja.al ka mësuar se atentatorët e krimit të dyfishtë që ndodhi në Laç, ishin të armatosur mirë kur mbërritën në vendin e krimit
Mësohet se Kreshnik Tusha, 21-vjeçari që mbeti edhe vetë i plagosur, bashkë me tre bashkëpunëtorët e tij kanë pasur armë zjarri të tipit kallashnikovë, me fishekë blind shpues.
Kjo, për faktin se atentatorët ishin në dijeni se një prej viktimave Bujar (Hasani) Lika lëvizte me mjet të blinduar.
Pista kryesore e hetimit, është një hakmarrje për ngjarjet e së shkuarës, ku Lika në 2016 mundi të sigurojë pafajsinë nga gjykata e Apelit lidhur me vrasjen e Nikajt.
