Gazetarja shqiptare në Itali, Alba Kepi, ka sjellë detaje të reja në lidhje me vrasjen e Ilaria Sula, shqiptareje 22-vjeçare.
Mark Antony Samson, i cili është autori i krimit, dha dëshminë e tij të premten për rreth pesë orë në gjykatë, ku pranoi autorësinë e vrasjes.
Kepi ka zbuluar detaje nga dëshmia e mikeshave të Ilaria Sula, të cilat ishin të fundit që e takuan para se ajo të zhdukej.
Sipas tyre, pas shkëmbimit të mesazheve në telefon, Ilaria ka zbritur për disa çaste jashtë banesës, por nuk është kthyer më.
Mikeshat e saj kanë treguar se Ilaria kishte marrë vetëm disa gjëra të vogla, të cilat zakonisht merren për një ditë të shkurtër, dhe kjo i ka çuar ata të dyshonin se diçka nuk shkonte kur ajo nuk u kthye pas një kohe të gjatë.
“Ilaria Sula jetonte me mikeshat e saj studente. Sipas rrëfimit të mikeshave, ajo ka shkëmbyer mesazhe në telefon dhe ka dalë nga banesa, ndërsa ato nuk e dinin ku ka shkuar. Supozohet që ajo ka folur me Mark Antony për tu sqaruar apo për tu takuar, këtë nuk e dimë. Pas takimit, kanë shkuar në apartamentin e Mark, ku ai jetonte me prindërit dhe krimi është bërë në dhomën e tij. Mikeshat kanë deklaruar se Ilaria ka marrë gjëra të vogla, të cilat merren për një ditë të shkurter, ndërsa kanë thënë se ajo nuk ka marrë gjëra për një largim për të qëndruar gjatë. Ata filluan të kishin dyshime pse ajo po vonohej kaq shumë kur ka dalë për kaq pak. Por prokuroria ka vepruar shpejt duke e zbuluar nëpërmjet telefonit që përdorte dinamikën e ngjarjes dhe, sigurisht, zbardhja e targës së makinës së babait të Mark Antony-t, 500 metra larg vendit ku u hodh valixhja, bëri që të merrej ai në polici dhe të pyetej,” tha Kepi.
Gazetarja ka shtuar se roli i prindërve të autorit mbetet i dyshimtë, pasi ata ishin në banesë gjatë momentit të krimit.
Edhe pse ata janë marrë në pyetje, ata nuk janë vënë në hetim, por ka dyshime se mund të kenë ndihmuar në fshehjen e trupit dhe në spostimin e tij me makinë.
“Dyshimet janë të forta edhe për prindërit, të cilët janë marrë në pyetje pasi kanë qenë në apartament në momentin e ngjarjes, por nuk rezultojnë të jenë vënë në hetim. Megjithatë, ka dyshime se ndoshta prindërit mund ta kenë ndihmuar në spostimin e trupit në automjet, qofte dhe në pastimin e asaj çfarë ka ndodhur,” tha Kepi.
Kujtojmë se filipinasi, Mark Antony Samson, pas krimit, ka fshehur trupin e Ilaria Sula në një valixhe dhe e ka hedhur në një zonë pyjore jashtë Romës, ku është zbuluar më vonë.
Për disa ditë, ai dërgonte mesazhe nga telefoni i saj dhe bëri postime në rrjetet sociale për të fshirë gjurmët.
