Mbledhja e Komisionit Hetimor për Sterilizimin dhe Check-up-in ka zgjatur rreth 9 orë këtë të martë.
Personi i parë që pritej të dëshmonte ishte ish-ministri i Shëndetësisë, Ilir Beqaj. Ai kërkoi të prezantonte me një material PowerPoint, por kjo nuk u lejua nga opozita, me kryetaren e komisionit, Albana Vokshi, duke deklaruar se prezantimet e tilla nuk lejohen.
Ky vendim shkaktoi debat mes anëtarëve të komisionit, veçanërisht atyre nga radhët e Partisë Socialiste.
Pas disa orëve debate dhe ndërprerje të mbledhjes, Vokshi njoftoi mbylljen e saj, duke theksuar se Komisioni Hetimor për Shëndetësinë do të rifillojë nesër në orën 10:30, me të njëjtin rend dite. Pritet që nesër të dëshmojnë Ilir Beqaj, Admir Daca, Altin Fani, Umbro Stalccini, Elisabetta Anzanello dhe Giorgio Tardioli.
