Ish-ministri i Mjedisit, Lefter Koka, ka përfituar një leje të përkohshme daljeje nga burgu i Durrësit për një periudhë prej 8 orësh, nga ora 11:00 deri në orën 19:00, për shkak të një situate familjare emergjente.
Ai është larguar nga burgu për të vizituar të ëmën, e cila po përballet me probleme serioze shëndetësore.
Leja e daljes është miratuar nga Ministria e Drejtësisë, drejtori i përgjithshëm i burgjeve dhe drejtori i burgut të Durrësit.
Lefter Koka mbahet në qeli që nga dhjetori i vitit 2021, në kuadër të hetimeve dhe dënimeve për aferën e inceneratorëve. Ai është dënuar me dy vite burg për inceneratorin e Tiranës, dënim që është konsideruar i shlyer për shkak të kohës së kaluar në paraburgim.
Megjithatë, ish-ministri ka edhe një dënim tjetër prej 6.8 vitesh për inceneratorin e Elbasanit. Për rastin e inceneratorit të Fierit, ku gjithashtu figuron emri i tij, çështja është ende në rigjykim.
Në prill të këtij viti, Gjykata e Posaçme dënoi Lefter Kokën me 3 vjet burg për aferën e inceneratorit të Tiranës, duke i zbritur një vit për gjykimin e shkurtuar. Përveç dënimit me burg, Koka do të jetë i ndaluar për pesë vite që të mbajë funksione publike.
Gjithashtu, SPAK ka çuar për gjykim disa nga të akuzuarit e kësaj afere, përfshirë ish-ministrin Lefter Koka, disa ish-zyrtarë të Bashkisë së Tiranës, si dhe anëtarë të komisionit të vlerësimit të ofertave.
Mes tyre është edhe ish-deputeti i Partisë Socialiste, Alqi Bllako, i cili akuzohet për përfshirje në falsifikimin e dokumenteve në bashkëpunim me Kokën dhe kryetarin e shpronësimeve, Pëllumb Abeshi, për inceneratorin e Elbasanit.
Bllakos i është dhënë dënim prej 2.8 vitesh burg dhe pesë vjet ndalim ushtrimi i funksioneve publike, ndërsa po ashtu është dënuar me 2.8 vite për inceneratorin e Fierit.
