Kryetarja e Komisionit të Apelimit në Partinë Demokratike, Adriana Kalaja, ka dorëzuar një kallëzim në SPAK ndaj ish kryebashkiakut të Tepelenës, Tërmet Peçi, si edhe pesë personave të tjerë të lidhur me Bashkinë dhe me kompani private.
Në kallëzim përfshihen Lorenc Bami, drejtues në Drejtorinë e Planifikimit dhe Kontrollit të Zhvillimit të Territorit në Bashkinë Tepelenë, bashkëshortja e tij Aleksandra Bami, ortake e kompanisë NG Structures shpk, Hekuran Hoxha ish ortak i kësaj kompanie, Fajton Hoxha ortak i NG Structures shpk, si edhe Julian Çela, ekonomist i kompanisë Iumentis shpk dhe kushëri i Lorenc Bamit.
Kalaja ka kërkuar nisjen e procedimit penal ndaj gjashtë të kallëzuarve për një sërë akuzash që përfshijnë: ushtrim të ndikimit të paligjshëm ndaj personave që ushtrojnë funksione publike sipas nenit 245/1 të Kodit Penal, shpërdorim detyre sipas nenit 248, kryerje veprimesh arbitrare sipas nenit 250, përfitim të paligjshëm interesash sipas nenit 257, shkelje të barazisë në tendera sipas nenit 258, korrupsion pasiv të personave që ushtrojnë funksione publike sipas nenit 259, korrupsion pasiv të funksionarëve të lartë shtetërorë ose të zgjedhurve vendorë sipas nenit 260, pastrim të produkteve të veprës penale sipas nenit 287, si edhe akuzat për organizatë kriminale, grup të strukturuar kriminal dhe kryerje të veprave penale nga këto struktura sipas neneve 333, 333/a dhe 334.
Sipas kallëzimit, të gjitha veprat dyshohet të jenë kryer në rrethana rënduese sipas nenit 50 dhe në bashkëpunim sipas nenit 25 të Kodit Penal.
Përveç ndjekjes penale, Kalaja ka kërkuar edhe fillimin e hetimit pasuror ndaj të kallëzuarve, në zbatim të Ligjit Nr. 10192, datë 3.12.2009, që parashikon masa parandaluese kundër pasurisë në rastet e krimit të organizuar, korrupsionit dhe veprimtarive të tjera të paligjshme.
Ajo ka paraqitur edhe një kërkesë pranë Gjykatës së Shkallës së Parë për Korrupsionin dhe Krimin e Organizuar, duke kërkuar pezullimin nga detyra të personave të kallëzuar, në bazë të nenit 242 të Kodit të Procedurës Penale.
Kallëzimi i është komunikuar gjithashtu ambasadorit të Bashkimit Europian në Shqipëri, Silvio Gonzato.
