Ditën e sotme gjykata e Matit ka miratuar mandatin e KQZ-së për kryebashkiakun e ri të Matit, Agron Malajn. Ky i fundit është fitues nga zgjedhjet e 30 qershorit të cilat u realizuan pavarësisht se presidenti Meta i çdekretoi.
Agron Malaj është ish-gardist i 21 janarit 2011. Ai u shkarkua asokohe nga ish-ministri i Brendshëm, Sajmir Tahiri. Rikujtojmë se në 21 janar 2011 mbetën të pajetë 4 qytetarë pasi gardistët qëlluan mbi protestuesit. Askush nuk mund ta kishte menduar se Malaj do të bënte karrierë në politikë, e aq më pak në radhët e Partisë Socialiste.
Në fushatën e zgjedhjeve lokale të 23 qershorit 2015 ai doli në krah të kryeministrit Edi Rama për të kërkuar votat për kandidaten socialiste. Disa muaj më vonë ai u emërua kryetar i Partisë Socialiste për Matin dhe në të njëjtën kohë mori edhe detyrën e drejtorit të OSHEE-së për këtë rreth.
Ky është mandati i dytë që u konfirmua nga gjykata për fituesit e zgjedhjeve të 30 qershorit për katër bashkitë e qarkut Dibër.
I pari ishte Ilmi Hoxha për Bashkinë Klos, ndërsa pritet që mandatin ta marrin edhe Lefter Alla për Bashkinë Bulqizë dhe Dionis Imeraj për Bashkinë Dibër.
