Gazetari kosovar, drejtori i portalit mediatik Valon Syla, është rrahur mesditën e sotme në Prishtinë. Ngjarja ka ndodhur në afërsi të lagjes “Pejton” në rrugën “Robert Doll”.
Ky sulm fizik ndaj gazetarit Syla erdhi pas shkrimeve dhe deklaratave të tij lidhur me fluksin e madh të mërgatës që kanë ardhur në Kosovë gjatë këtyre ditëve.
Në rrjetet sociale janë shpërndarë edhe pamjet e momentit kur gazetari Valon Syla dhunohet në mes të Prishtinës. Pamjet janë siguruar nga qytetarë të rastit dhe më pas video është bërë virale nga mediat dhe rrjetet sociale.
Postimi i plotë i gazetarit Valon Syla:
“I lus gërrnaçat që në këtë turrë mi ndreq dhëmbët hatri jonë këtu. Me na ndreq edhe ekonominë tu i ndreq dhëmbët e juaj. Kqyrni ndreqnu edhe thonjtë, feniratnu, edhe poliratni kerret.
Hani edhe naj qebap, naj redbull, kush e blen një kofe me akull me vodkë 1L edhe ma mirë… Se ma lirë është. Se a për neve pe bleni? Ne në Gjermani e Zvicër s’ja u qet. Fleni si sardina në konzervë midis Evropës. Për ata mos na teshni. Se për veti e keni. Mirë se vini në Kosovën e lirë. Mos e teproni, se dalim fitim”, shkruan në rrjetin social Facebook, gazetari i portalit mediat Metro në Kosovë, Valon Syla.
Ky postim i tij, por edhe deklaratat e mëhershme në disa emisione në prime time televiziv në Kosovë, ku dalja e fundit ishte në TV Dukagjini, kanë ngjallur irritim dhe pakënaqësi te shumë qytetarë të Kosovës por edhe te shtetasit kosovarë në diasporë, ndaj të cilëve ka qenë edhe “shënjestra” e deklaratave të gazetarit Syla./Gazetareforma.com/
