Interpol ka njoftuar për arrestimin e 20 personave në Evropë dhe në kontinentin amerikan, si rezultat i një operacioni ndërkombëtar kundër abuzimit seksual me fëmijë, i zhvilluar në bashkëpunim me 12 shtete.
Operacioni, i cili nisi në fund të vitit të kaluar nën drejtimin e policisë spanjolle, u ngrit pas zbulimit të disa grupeve online ku shpërndaheshin imazhe të abuzimit seksual të të miturve.
Në Spanjë u arrestuan shtatë persona, mes tyre një punonjës shëndetësor dhe një mësues. Sipas Interpolit, punonjësi shëndetësor dyshohet se ka paguar të mitur në Evropën Lindore për materiale eksplicite, ndërsa mësuesi akuzohet për posedim dhe shpërndarje të imazheve të abuzimit në disa platforma digjitale.
Në Amerikën Latine, janë ndaluar 10 të dyshuar në shtatë shtete, mes tyre tre në El Salvador dhe një tjetër, po ashtu mësues, në Panama. Arrestime janë kryer edhe në pjesë të tjera të Evropës dhe në Shtetet e Bashkuara.
Interpol njofton gjithashtu se janë identifikuar edhe 68 persona të tjerë si të dyshuar, ndërsa hetimet për këtë rrjet të gjerë kriminal vijojnë.
