Interi është tronditur mëngjesin e së shtunës, vetëm disa orë përpara finales së Champions League, nga lajmi i ndarjes nga jeta të ish-presidentit legjendar, Ernesto Pelegrini. Ai u shua në moshën 84-vjeçare, duke lënë pas një trashëgimi të paharrueshme në historinë e klubit zikaltër.
Pelegrini mbahet mend si arkitekti i “Scudettos së rekordeve” gjatë sezonit 1988-1989, ku Interi fitoi titullin kampion me 58 pikë nga 68 të mundshme — një arritje e jashtëzakonshme për atë kohë, kur fitorja vlente vetëm dy pikë. Gjatë drejtimit të tij, klubi u përforcua ndjeshëm me yje të mëdhenj gjermanë si Karl-Heinz Rummenigge, Lothar Matthäus, Jürgen Klinsmann dhe Andreas Brehme, duke ndërtuar një ekip të fuqishëm në arenën evropiane.
Trofeu i fundit i madh i fituar nën presidencën e Pelegrinit ishte Kupa UEFA në vitin 1994, kur Inter mposhti Salzburgun në finale dhe riktheu lavdinë evropiane për klubin.
Në shkurt të vitit 1995, Pelegrini u tërhoq nga drejtimi i klubit dhe shiti aksionet e tij tek Massimo Moratti, duke shënuar fundin e një epoke dhe nisjen e një kapitulli të ri në historinë e Interit.
“Presidenti Ernesto Pelegrini na ka lënë. Për njëmbëdhjetë vjet ai e udhëhoqi Interin me mençuri, nder dhe vendosmëri, duke lënë një gjurmë të pashlyeshme në historinë e klubit tonë,” thuhet në deklaratën zyrtare të klubit, që shpreh ngushëllimet më të thella për familjen e tij dhe gjithë komunitetin Nerazzurri.
