India ka arritur shifra alarmante të humbjes së jetëve nga koronavirusi. Mbi 200,000 pacientë kanë humbur jetën nga COVID-19. Sistemi shëndetësor në Indi është në kolaps, ndërsa numri real i viktimave dyshohet të jetë më i lartë. Spitalet po përballen me mungesë oksigjeni, si edhe mungesë të shtretërve për pacientët, të cilët janë vendosur edhe në parkingje makinash për të marrë trajtim të kësaj sëmundje.
Janë raportuar të paktën 300,000 infektime në ditë gjatë javës së kaluar, ndërsa këtë të mërkurë u raportuan mbi 360, 000 raste në 24 orë. Por jo vetëm mungesa e oksigjenit, por dhe fushata e Narendra Modi, kryeministrit të Indisë, ka ndikuar për të përhapur në mënyrë masive virusin, për shkak të grumbullimeve të shumta.
Edhe në Shqipëri, ka pasur grumbullime masive në kohë fushate, por të shpresojmë se nuk do të kemi një përhapje masive të virusit, në ritmet e Indisë. Kjo pasi dhe Shqipëria vuan për bombula oksigjeni, pasi çmimi këtu është shumë i lartë dhe niveli ekonomik i shqiptarëve, nuk e përballon dot.
Në përgjimet e “Ndraghetas”, sipërmarrësit italianë të arrestuar kanë hapur biznese në Shqipëri, veçanërisht në ndërtim dhe shëndetësi. Për këtë arsye, përfaqësuesit e mafies kanë përdorur si ndërmjetës politikanë italianë, të cilët janë të lidhur me politikanët dhe zyrtarët e lartë në Shqipëri.
Në përgjime ka biseda për takime me zyrtarë të Bashkisë Tiranë apo ministra, ku qëllimi ishte marrja e lejeve të ndërtimit në qendër të qytetit, si dhe marrja e tenderave në shëndetësi, për të furnizuar spitalet me mjete spitalore. Bombulat e oksigjenit janë një ndër mjetet spitalore që kushtojnë më shumë dhe çmimi i tyre është rritur ndjeshëm, që pas ardhjes së pandemisë.
Edhe në Shqipëri, ashtu si në Indi, ka pasur probleme të shumta me bombulat e oksigjenit, për shkak të çmimit të lartë. Personat e infektuar me COVID-19 ose nuk kanë pasur mundësinë të paguajnë për të marrë ndihmën e oksigjenit, ose janë zhytur në borxhe për të shpëtuar jetën e tyre.
