Kryetari i Bashkisë Gramsh, Besion Ajazi, dha një deklaratë për mediat lidhur me rastin e helmimit të fëmijëve në një nga kopshtet e qytetit. Ai nënvizoi se është detyrë e institucioneve kompetente, si Instituti i Shëndetit Publik dhe Policia, të hetojnë thellë për të përcaktuar shkakun e ngjarjes dhe të ndërmarrin masat e nevojshme në rast se konstatohen shkelje.
Ajazi shtoi se kompania fituese e tenderit për furnizimin e ushqimeve ka përmbushur të gjitha analizat dhe që produktet janë në përputhje me standardet higjieno-sanitare. Ai gjithashtu hodhi poshtë çdo pretendim për presion dhe kërkoi që kjo ngjarje të mos instrumentalizohet për qëllime politike.
Ta gjejnë arsyen ISHP, Policia, institucionet dhe nëse ka shkelje, të merren masat përkatëse. Kompania që ka marrë të drejtën për ushqimet në Gramsh ka fituar tenderin. Nuk ka rast të një produkti ushqimor pa fletë analize. Nuk mundet që kryetari i Bashkisë të dijë vlerën e tenderit, me këtë merren të tjera instanca. Thonë se na kanë bërë presion, të dalë njëri dhe ta thotë. Rasti i helmimit mos përdoret për politikë. S’i kemi bërë presion askujt. Ushqimet janë në kushte shumë të mirë higjeno-sanitare, tha kryetari i Bashkisë Gramsh, Besion Ajazi
