Imazhet satelitore zbulojnë mbrojtjen ruse përpara sulmit kundër Ukrainës

BBC ka zbuluar disa nga imazhe ku duken mbrojtjet e gjëra të ndërtuara nga Rusia ndërsa përgatitet për kundërsulm të madh ukrainas.
Pas muajsh ngërçi, sulmi i pritshëm ka të ngjarë të jetë një provë vendimtare për Ukrainën, pasi ajo kërkon të provojë se mund të arrijë përfitime të rëndësishme në fushën e betejës me armët që ka marrë nga Perëndimi.
Duke ekzaminuar qindra imazhe satelitore, BBC ka identifikuar disa pika kyçe në ndërtimin e konsiderueshëm të llogoreve dhe fortifikimeve të tjera në Ukrainën jugore që nga tetori.
Këto katër lokacione ofrojnë një pasqyrë se çfarë pret Rusia nga kundërsulmi dhe çfarë mbrojtjeje mund të hasin forcat ukrainase.
Bregdeti perëndimor i Krimesë
E pushtuar nga Rusia në vitin 2014, Krimea ishte e njohur më parë për vendpushimet e saj në plazh.
Tani, në vend të shezlloneve dhe çadrave të diellit, vija bregdetare që shtrihet për 25 kilometra është e mbushur me struktura mbrojtëse të instaluara nga trupat ruse.
Imazhi më poshtë tregon të vetmin plazh me rërë të hapur në bregun perëndimor pa mbrojtje natyrore si shkëmbinjtë apo kodrat.
Nëse forcat ukrainase përpiqen të përdorin këtë rrugë, Rusia ka të ngjarë ta shënjestrojë atë me artileri të rëndë nga prapa mbrojtjes së tyre. Pozicioni i Rusisë është gjithashtu në rrezen e një rruge tjetër aty pranë – T401 – e cila gjithashtu mund të jetë në shënjestër.