Pasja e një sistemi drejtësie duket se nuk është duke shkuar në rrugën e duhur, sidomos pas zbulimeve të fundit dhe këtë herë kemi edhe një provë të re që na e vërteton.
Në emisionin STOP, është publikuar historia e një djali. Erion Hena, babin e të cilit e kanë vrarë 7 vite më parë, dhe për të marrë vendimin atij i duhet të trokase në dyert e gjykatës dhe prokurorisë së Korçës për të bërë drejtësi, po askush spo ia jep.
Hena ka thënë se këto sjellje janë duke e çuar atë drejt vetëgjyqësisë dhe këtë e përforcon edhe me filmimin e prokurores Oli Visi e cila thotë: “Nuk më intereson se çfarë bën ti. Nga ne nuk ke pengesë!”.
Babi i denoncuesit, 58-vjeçari Ethem Hëna u vra në lokalin ku punonte si roje në 2012. Djali i tij Erion Hëna, denoncoi në emisionin “Stop” mungesën e hetimit dhe lënien të lirë të autorit të vrasjes Edison Kodralliu. Veç anëve të errëta të hetimit të kësaj çështjeje, emisioni “Stop” solli dëshmi ekskluzive me audio të banorëve të fshatit, që kishin parë natën e krimit vrasësin.
Sipas Klan Tv, pasi u rihap çështja, dosja nga policia shkoi në Prokurorinë e Korçës ku iu caktuar për hetim prokurores Oli Visi. Ndër të tjera, ajo kishte dy detyra kryesore: Marrjen e dëshmitarit, i cili pranonte se kishte parë konfliktit midis të ndjerit dhe të dyshuarit kryesor dhe bërjen e thelluar të aktit kimik, për të vërtetuar që faktorët plotësues të gjetur në bluzën e Kodralliut vinin nga baruti, apo nga faktorë të tjerë.
Avokati Arben Llangozi tregon: “Nga ana e Prokurorisë së Korçës çuditërisht, sepse vetëm organ procedues nuk mund të quhet, e ka mbuluar sërish edhe këtë provë. Ky dëshmitar, që është konkret, nuk është pyetur asnjëherë nga organi i prokurorisë”.
Djali i viktimës Erion Hëna, nëpërmjet kamerës së fshehtë përballet vetë me prokuroren Visi.
Djali i viktimës-D.m.th, e dorëzuat si dosje?
Prokurorja Oli Visi-Po tani kemi mbaruar, e kemi bërë njoftimin… Unë bëra ato veprime që na dolën gjatë hetimit, me ato veprime unë nuk arrija dot që t’ia provoja, që ishte ai autori, në rast se…
Djali i viktimës-Po si do ta provoje e nderuar, kur nuk merr dëshmitarët?
Prokurorja Oli Visi-Kë dëshmitar?
Djali i viktimës- Ti thua, që Mujon s’e gjej…Mondi thotë…
Prokurorja Oli Visi-Kë Mondi?
Djali i viktimës-Ai që ishte në tavolinë me Mujon.
Prokurorja Oli Visi-Si thotë Mondi?
Djali i viktimës-I ke parë filmimet, dëgjoji!Po gjeja anën ligjore, moj e nderuar!
Prokurorja Oli Visi-Po si ta gjej?
Djali i viktimës-Po ku di unë? Ju jeni person kompetent për këtë gjë. Do më bëni të shkoj në vetëgjyqësi. Do shkoj, do ta vras vetë!
Prokurorja Oli Visi-Atë çfarë do bësh, mos më thuaj! Nuk më intereson…
Djali i viktimës-Jo! Ty nuk të intereson, sepse e kupton…
Prokurorja Oli Visi-Nga ne nuk ke ndonjë pengesë…
Djali i viktimës-Jo s’ka sesi, pengesa vetëm kur të më merrni, të më vini prangat…
Prokurorja Oli Visi-Mbase s’më bie mua radha…,mund t’i bjeri ndonjë tjetri.
Djali i viktimës-Nuk logjikohet kështu, e nderuar! Nejse…
