Një 32-vjeçar është arrestuar nga Policia e Dibrës pasi u kap në flagrancë për vjedhjen e një çante me para, ndërkohë që në banesën e tij u gjetën drogë, fara kanabisi dhe municion luftarak.
Sajmir Bitri, banues në fshatin Laças, u ndalua pas hetimeve të nisura nga policia pas denoncimit të një shtetasi, të cilit i ishin vjedhur para në euro dhe lekë.
Operacioni i koduar “Përsëritësi” çoi në identifikimin dhe ndalimin e autorit të dyshuar, i cili rezulton të jetë person me precedent të mëparshëm penal për vjedhje.
Gjatë kontrollit të ushtruar në banesën e Bitrit, uniformat blu zbuluan dhe sekuestruan një sasi kanabisi të ndarë në doza gati për shitje, 270 fara kanabisi, 6 kubikë të mbjellë me fara narkotike dhe municion luftarak.
Materialet i janë referuar Prokurorisë pranë Gjykatës së Shkallës së Parë Dibër për hetime të mëtejshme.
