Një 38-vjeçar është vënë në pranga nga Policia e Vlorës, pasi dyshohet se ka shkaktuar zjarr në mënyrë të përsëritur në pikën e grumbullimit të mbetjeve urbane në zonën e Jallit, Nartë.
Zjarret, të ndezura në dy raste të ndryshme më 30 qershor dhe 1 korrik 2025, përveçse kanë sjellë ndotje të konsiderueshme të ajrit dhe mjedisit, kanë rrezikuar të përhapen drejt zonës së banuar dhe pyllit të Sodës, një territor i mbrojtur me vlerë të lartë ekologjike.
I arrestuari, me inicialet E. I., banues në lagjen “24 Maji” në Vlorë, është kapur në flagrancë nga strukturat e Komisariatit të Policisë Vlorë, pas hetimeve të nisura për zjarrvëniet e qëllimshme apo të shkaktuara nga pakujdesia.
Sipas njoftimit zyrtar të policisë, ngjarjet kanë ndodhur:
• më 30.06.2025, rreth orës 20:50,
• dhe më 01.07.2025, rreth orës 12:00.
Në të dyja rastet, E.I. dyshohet se ka ndezur qëllimisht mbetjet në vendgrumbullimin e inerteve, duke shkaktuar pasoja të rënda për mjedisin.
Materialet hetimore në ngarkim të tij i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprën penale “Ndotja e ajrit”, e parashikuar nga neni 201 i Kodit Penal.
Drejtoria Vendore e Policisë Vlorë ka përsëritur thirrjen për kujdes maksimal, sidomos në këtë periudhë me rrezik të lartë për zjarre, duke theksuar se çdo veprim i papërgjegjshëm mund të rrezikojë jetën, pronën dhe mjedisin.
