Një 39-vjeçar nga Kavaja është ekstraduar ditën e sotme nga Italia në Shqipëri.
Bëhet fjalë për shtetasin Bashkim Demrozi, i cili ishte dënuar me 6 vite e 8 muaj burg pasi tentoi që të kalonte kufirin italian me 330 kg drogë.
Ai ishte shpallur në kërkim nga shteti shqiptar, pasi Gjykata e Krimeve të Rënda kishte vendosur 8 vite heqje lirie për të, mirëpo Apeli i Durrësit i kishte ulur dënimin me 2 vite.
Ngjarja ka ndodhur më 19 gusht të 2014, ku Demrozi në bashkëpunim me tre shtetas të tjerë, Muhamet Demrozi, Agim Demrozi, Ermal Lusha, tentuan të transportonin 332 kg kanabis drejt qytetit të Barit.
Muhamet Dermozi tregoi në polici se lëndën narkotike e kishte siguruar nga një shtetas me emrin “Çimi”, i cili gjithashtu ishte siguruar që ta sistemonte atë vetë në kamion.
NJOFTIMI I PLOTË:
Interpol Tirana
Bashkëpunimi mes Interpol Tirana dhe Interpol Roma, bëri të mundur kapjen dhe ekstradimin nga Italia të një shtetasi shqiptar, i dënuar për veprimtari kriminale në fushën e narkotikëve.
Nga ZQK Interpol Tirana u krye ekstradimi nga Milano/Itali, i shtetasit shqiptar Bashkim Demrozi, 39 vjeç, lindur në Kavajë.
Shtetasi Bashkim Demrozi ishte shpallur në kërkim ndërkombëtar nga ZQK Interpol Tirana, pasi Gjykata e Shkallës së Parë për Krimet e Rënda e ka dënuar me 8 vjet burg, për veprën penale “Trafik i lëndëve narkotike, kryer në bashkëpunim, mbetur në tentativë”. Pas apelimit, Gjykata e Apelit Durrës, në vitin 2018, e ka dënuar përfundimisht me 6 vjet e 8 muaj burg.
Përmbledhje e ngjarjes së ndodhur:
Në vitin 2014, në qytetin e Durrësit, gjatë kontrollit të kryer nga shërbimet e Policisë, në automjetin që drejtohej nga shtetasi F. D., i cili do udhëtonte nga Durrësi në Bari, u gjetën dhe u sekuestruan 332 kg cannabis sativa.
Nga hetimet ka rezultuar se shtetasi Bashkim Demrozi, në bashkëpunim me shtetas të tjerë, ka kryer veprime për gjetjen dhe trafikimin e lëndës narkotike.
Si rezultat i bashkëpunimit të Interpol Tirana me Interpol Roma, u bë i mundur arrestimi i tij në Itali, duke u finalizuar me ekstradimin drejt vendit tone.
