Mëngjesin e sotmëm është hedhur në erë me tritol lokali i efektivit të policies, Ndrek Rrasa. Tashmë janë publikuar pamjet e momentit kur i vihet flaka lokalit dhe furgonit. Në videon e siguruar nga Ballkan Web shihet një person i veshur si grua, me fustan dhe paruke të zeza, ku fillimisht vendos flakë në derën e lokalit, dhe më pas poshtë furgonit.
Rrasa mësohet se ka deklaruar për grupin hetimor se nuk ka konflikte dhe nuk e di se kush mund të jetë autori i vendosjes së lëndës shpërthyese në lokalin e tij.
“Nuk kam konflikte me persona të tjerë dhe nuk e kam idenë se kush mund ta ketë vene tritolin apo se kush e ka djegur autobusin”, mësohet të ketë thënë efektivi 46-vjeçar. Theksojmë se dëmet materiale janë të konsiderueshme, ndërsa kanë nisur hetimet për kapjen e autorëve. Grupi hetimor nën drejtimin e Prokurorisë së Rrethit Gjyqësor Shkodër, po punon për zbardhjen dhe sqarimin e plotë të kësaj ngjarje. Nuk dihen ende motivet e këtij akti dhe nëse ka lidhje me detyrën e efektivit Rrasa.
Njoftimi i policisë së shtetit:
Shkodër/Informacion Paraprak
Rreth orës 02:20, në fshatin Grudë e re, Shkodër, ka shpërthyer lëndë plasëse në derën e lokalit të shtetasit N. Rr. 46 vjeç , banues në fshatin Grudë e re, me detyrë punonjës policie pranë Komisariatit të Policisë Shkodër.
Për pasojë ka vetëm dëme materiale në lokal si dhe është dëmtuar edhe mjeti i tij autobus, i parkuar para lokalit.
Grupi hetimor nën drejtimin e Prokurorisë së Rrethit Gjyqësor Shkodër, po punon për zbardhjen dhe sqarimin e plotë të kësaj ngjarje.
