Prokuroria e Posaçme ka nisur prej disa kohësh një hetim për verifikimin e pasurisë së ish-ministrit të Brendshëm Saimir Tahiri. Këto hetime kanë detyruar të paraqitet në ambjentet e SPAK, biznesmenin nga Fieri, Lulzim Morina. Ky i fundit ka dhënë shpjegime në lidhje me disa trasaksione bankare mebashkëshorten e Saimir Tahirit, Fatlinda Tahirin. Bëhet fjalë për mbi 100 mijë euro transferta në llogarinë e bashkëshortes së Tahirit që janë kryer gjatë viteve 2016-2017.
Morina, ka pranuar kryerjen e këtyre transaksioneve, duke pretenduar se shumat financiare janë dhënë në formën e borxhit dhe sipas tij, ky borxh është kthyer sërish mbrapsht. Për të vërtetuar deklaratën e tij ai është ofruar për t’i vënë në dispozicion hetuesve të çështjes mandatet bankare të transaksionit.
Pas kësaj dëshmie të shkurtër Morina është lënë i lirë të shkojë, por SPAK i ka sekuestruar biznesmenit aparatin e telefonit.
Bllokimi i telefonit të Morinës është kryer me qëllim kqyrjen e bisedave dhe ekspertimit teknik të tij, ku shpresohet të gjendet biseda dhe materiale që i shërbejnë këtij hetimi.
Prej disa kohë SPAK, ka nisur një hetim pasuror ndaj Saimir Tahirit dhe njerëzve të afërm të familjes së tij, si gruaja, kunati Alban Berisha, nëna dhe persona të tjerë.
Si pasojë e verifikimeve, ka rezultuar se marrëdhënie financiare ka pasur dhe Lulzim Morina, i cili dy ditë më parë u thirr në SPAK për të dëshmuar.
SPAK ka shtrirë verifikimet dhe tek disa biznese që gëzon me letra Alban Berisha si “Ferma 100” dhe disa kontrata noteriale ku janë blerë mijëra sipërfaqe toke në fshatin “Vishnje”.
Hetimi pasuror ndaj Tahirit po kryhet në bazë të ligjit anti-mafia, pas procedimit penal si i pandehuri i prokurorisë në trafikun e drogës nga Shqipëria në Itali.
Por për këtë dosje penale, Tahiri u dënua me vetëm 4 vjet e 8 muaj burgim për akuzën e “Shpërdorimit të detyrës” dhe jo për akuzat e ngritura nga prokuroria.,
