Kryeministri Edi Rama i zhytur prej kohësh në pushtet, po përpiqet me çdo mënyrë për të fituar në mandat të tretë qeverisës. Vetë Rama dhe njerëz të qeveris së tij po propagandojnë kudo në media se mandatin e tretë e duan pasi kanë në duar shumë punë e projekte, që nuk mund të lihen në mes.
Jo pa qëllim projektet e premtuara 4 apo tetë vite më parë u zvarritën deri sot, për të përforcuar dhe njëherë idenë se forca e vetme politike për të përparuar në vaksinim dhe rindërtim është vetëm Partia Socialiste.
Pra, për kryeministrin nuk ishin të mjaftueshme tetë vite pushtet, krejt i vetëm në pushtet, me “tepsinë” të gjithën për vetë, por në mënyrë qesharake dhe aspak respektuese për qytetarët, na vë kusht përfundimin e projekteve të nisura me votat më 25 prill.
Prej disa ditësh tashmë, kryeministri publikon çdo mëngjes në rrjetet sociale nga një video, për të dëshmuar punën që po bën qeveria. Mëngjesin e sotëm ka publikuar pamjet e transformimit të qendrave shëndetësore.
“MIRËMËNGJES dhe me ndryshimin kolosal nga themelet të qendrave shëndetësore të #Tiranës, që kanë dal nga errësira në dritë me programin tonë të rindërtimit të 300 qendrave shëndetësore, ju uroj një ditë të mbarë”, shkruan Rama.
Një tjetër premtim në prag fushate e ka dhënë kryebashkiaku Erion veliaj, i cili premtoi ndërtimin e 5 shkollave të reja në Don Bosko.
“Pesë shkolla të reja vetëm në Njësinë 9 në Tiranë, dy prej të cilave në zonën e “Don Boskos”, do të mirëpresin nxënësit me kushte shumë herë më të mira vitin e ardhshëm mësimor.”, është shprehur Veliaj për mediat.
Por premtimet boshe arritën kulmin me ministren e Infrastrukturës Belinda Balluku. Nga aeroporti i Kukësit që është premtim i shumë viteve më parë nga qeveria Rama, vetëm dje (3 Mars 2021) u bë testimi i parë i fluturimit.
Balluku, pa vënë ende në funksion këtë aeroport, premtoi dhe ndërtimin ne pesë të tjerëve brenda vetëm një mandati.
Ajo që shumë mund të pyesin, është se sa vite mund të duhen për pesë aeroporte kur vetëm për të Kukësit u deshën 2 mandate.
