Seanca e radhës gjyqësore ndaj Dritan Dajti është shtyrë, pasi Gjykata e Elbasanit nuk ka mundur të realizojë lidhjen me videokonferencë me IEVP Peqin.
Po ashtu, Drejtoria e Përgjithshme e Burgjeve ka refuzuar të marrë përsipër shoqërimin e Dajtit në gjykatë për arsye sigurie.
Dajti, i dënuar për vrasjen e katër efektivëve të policisë, ka kërkuar që gjykata të konstatojë dhe të shpallë të pamundur ekzekutimin e vendimit të Gjykatës së Krimeve të Rënda, pasi sipas tij, ky vendim është i pavlefshëm për shkak të mungesës së nënshkrimeve të katër anëtarëve të trupit gjykues.
Ai pretendon gjithashtu se ka përfunduar dënimin më 17 gusht 2024 dhe po mbahet në qeli pa të drejtë. Nëse kjo nuk pranohet, Dajti kërkon që gjykata të vendosë në dispozicion urdhrin e ekzekutimit për dënimin me burgim të përjetshëm, i cili sipas tij nuk ekziston.
