Viktor Ymeri në bashkëpunim me Gazmend Brakën kanë ekzekutuar në 1999 në Durrës dy anëtarë të një tjetër grupi kriminal, Arben Pajën dhe Ilir Xhungën.
Kështu, Ymeri u dënua me 25 vite burgim nga Gjykata e Apelit, por muajin e kaluar Gjykata e Elbasanit ka vendosur ta lirojë nga burgu.
Koha e përllogaritjes së shlyerjes së këtij dënimi, sipas Gjykatës së Apelit, fillon në 29 qershor 1999, dhe që prej kësaj dite e deri më tani, pjesa më e madhe e dënimit prej 25 viteve burgim thuajse se është kryer.
Ymeri është liruar në kushtet kur vendimi tjetër gjyqësor pranon si ditë burgu edhe ditët e punës.
Së fundmi, ‘Gazeta Panorama’ ka zbardhur vendimin e gjykatës.
Në këtë vendim thuhet edhe se vetë prokurori ka qenë dakord me kërkesën e Viktor Ymerit, por “pavarësisht kësaj për shkaqe të paqarta ai ka paraqitur ankim kundër këtij vendimi, duke refuzuar që të bëjë ekzekutimin e vendimit, në kundërshtim me atë që kishte urdhëruar vendimi gjyqësor”.
Prokuroria e Elbasanit nuk ka qenë dakord me vendimin e gjykatës për lirimin e Ymerit.
Sipas saj, gjykata ka zbatuar gabim ligjin, pasi ka llogaritur si ditë dënimi ditët e punës së kryera në burg.
Kështu, pritet që ajo të kërkojë kthimin e Ymerit në qeli.
