Një 41-vjeçar është arrestuar nga Policia, pasi ishte shpallur në kërkim për dy vepra penale të rënda.
I dyshuari, Dritan Kullaj, u kap nga shërbimet e Policisë Kufitare në Pikën Kufitare të Qafë Morinës, gjatë kontrollimeve të intensifikuara dhe pas bashkëpunimit të ngushtë me strukturat e tjera të Policisë.
Kullaj ishte shpallur në kërkim nga Komisariati i Policisë Nr. 4 në Tiranë, për shkak se Gjykata e Shkallës së Parë e Juridiksionit të Përgjithshëm në Tiranë kishte caktuar masën e sigurisë “Arrest në burg” ndaj tij.
Ai akuzohet për dy vepra penale: “Mbajtja pa leje dhe prodhimi i armëve, armëve shpërthyese dhe i municionit” dhe “Vënia në dispozicion e lokaleve për zhvillimin e lojërave të palejuara”.
Pas arrestimit, Dritan Kullaj u dorëzua për ekzekutimin e masës së sigurisë tek autoritetet përkatëse të Komisariatit të Policisë Nr. 4.
