Blendi Teta është i arrestuari i vetëm për vrasjen e ish-policit, Santiago Malko.
Avokati i tij, i pyetur nga “TCH”, pretendon se Teta është kërcënuar me jetë.
Menjëherë pas masës së sigurisë, 39-vjeçari u dërgua larg Tiranës, në kushte të forta sigurie.
Mirëpo Teta pretendon se edhe aty ka marrë kërcënime për jetën.
Sipas avokatit mbrojtës, 39-vjeçari ishte frikësuar edhe para prangosjes, prandaj është vetëdorëzuar.
Policia ka disa pista për vrasjen e Santiago Malkos, duke qenë se dyshohet se është përfshirë në disa ngjarje kriminale.
Gjithashtu Malko është mik me Ervis Martinajn dhe ndodhej në lokalin në ish-bllok natën kur ndodhi vrasja.
Nga këqyrja e kamerave të disa bizneseve, u vu re se pak përpara krimit, Malko po ndiqej nga dy makina, në njërën prej të cilave ndodhej edhe Blendi Teta.
Ky i fundit ka pranuar të bashkëpunojë me hetuesit, duke nxjerrë emrat e vëllezërve Duka dhe një shtetasi nga Vlora, të cilët janë shpallur në kërkim.
Teta akuzohet nga Prokuroria për veprime që pengojnë zbardhjen e së vërtetës, ndërsa nuk dihet ende nëse i është ofruar apo jo statusi i bashkëpunëtorit të drejtësisë.
