Ish-ministrja e Arsimit, Besa Shahini ka reaguar në lidhje me ngjarjen që ndodhi gjatë ditës së sotme në Kosovë, ku u arrestua edhe bashkëshorti i saj, kreu i PSD-së, Dardan Molliqaj.
Shahini në postimin e saj thotë se kryeministri i Kosovës, Albin Kurti do që të shuaj çdo zë opozitar në Kosovë dhe ka shtuar më tej se kjo mani e tij ka kaluar në absurditet.
Ndër të tjera ish-ministrja ka shtuar se aktivistët janë rrahur dhe janë arrestuar në mënyrë të dhunshme. Ndër të tjera ajo thotë se Albin Kurti i nxjerr ministrat e vet në protestë, për ta përvetësuar kauzën.
Postimi i plotë:
Nevoja e Albinit që të shuajë çdo zë opozitar në Kosovë ka kaluar në absurditet. Pesë aktivistët në aksionin simbolik kundër gjykatës së padrejtë speciale – tashmë e shndërruar në gjykatë kundër UÇK-së u rrahën dhe arrestuan dhunshëm. Në korrik ndodhi e njejta, kur Albini nxorri policinë për të mbrojtur një taksë absurde shtesë të regjistrimit të makinave, të cilën e tërhoqi më vonë.
Para kësaj, u organizua një protestë e vogël kundër hipokrizisë së VV-së e cila bëri fushatë të hapur elektorale, të rrezikshme për shëndetin midis pandemisë dhe menjëherë pasi fitoi zgjedhjet vendosi masa të rrepta duke u thirrur në pandemi, që rezultuan në mbyllje biznesesh dhe gjobitje marramendëse të qytetarëve. Protesta u mbyll me dhunë policore, aq në shpërputhje me aksionin e protestuesve, sa nuk ishte parë që nga koha e UNMIK-ut.
Nëse nuk i shuan me dhunë, Albini nxjerr ministrat e vet në protestë, për ta përvetësuar kauzen, siç ndodhi me daljen e turpshme të ministres së drejtësisë dhe atij të brendshëm në protestat kundër vrasjes brutale të një gruaje të re nga partneri i saj.
Shëndeti i demokracisë në Kosovë është në pikën e vet më të brishtë që nga paslufta. E vetmja fije shprese është fakti që nën pushtetet e dhunshme, pashmangshëm rritet e forcohet opozita. Kështu që paradoksalisht, nevoja dhe hapësira për opozitë të re dhe të zëshme po vjen duke u rritur.
