Presidenti Ilir meta ka reaguar ashpër pas lajmit se shqipëria do t’i paguajë 110 milionë euro ish-pronarit të Agon Channel, Francesco Becchetti, pas humbjes së gjyqit në arbitrazh. Në një postim në Facebook Meta shkruan se e ka paralajmëruar prej kohësh qeverinë të heq dorë nga arrogance e të tërhiqet nga çdo vendim abuziv ndaj investitirëve të huaj. Presidenti shkruan më tej se vetëm për teka dhe kapriçot personale të Edi Ramës Shqipëria do të paguajë 110 milionë euro. Skandali bëhet edhe më i madh për faktin se Avokatura e Shtetit e ka gënjyer presidentin duke i thënë se nuk e ka humbur gjyqin.
“E kam paralajmëruar prej kohësh Qeverinë ende në detyrë të heqë dorë nga arroganca dhe të tërhiqet nga çdo vendim abuziv e jashtë procedurave ligjore ndaj investitorëve të huaj në vendin tonë.
Vetëm për tekat dhe kapriçot personale të Kryeministrit, i cili e urren edhe lirinë e medias, tashmë Shqipëria është e detyruar të paguajë 110 milion euro.
Skandali merr përmasa më të mëdha, për shkak se Avokatura e Shtetit e ka gënjyer Presidentin e Republikës duke pretenduar se nuk e ka humbur gjyqin me kompaninë në fjalë, madje duke fshehur informacion.
Në këto kushte, i bëj thirrje Prokurorisë së Posaçme Antikorrupsion (SPAK), të nisë urgjentisht hetimet penale për këtë dëm të madh ekonomik të shkaktuar shtetit dhe që do paguhet fatkeqësisht me paratë e të gjithë taksapaguesve shqiptarë.
Është koha, që Drejtësia të vendosë para përgjegjësisë ligjore, të gjithë shkaktarët e këtij dëmi ekonomik, edhe për të parandaluar në të ardhmen dëme më të mëdha për Buxhetin e Shtetit dhe taksapaguesit shqiptarë, për shkak të shpërdorimit të detyrës dhe abuzimit me pushtetin të zyrtarëve të lartë”, shkruan Meta.
