24-vjeçarja Florijana Ismaili u gjet e pajetë para pak ditësh në liqenin e Komos në Itali. Trupi i saj u gjet në një thellësi prej 204 metrash dhe jo shumë larg vendit ku ishte zhdukur.
Ajo kishte shkuar me pushime nga Zvicra në Itali me një shoqen e saj, por pasi ishte futur në liqen, nuk kishte mundur dot të dilte më. 24-vjeçarja luante me Zvicrën dhe Young Boys.
Ditën e sotme, në një ceremoni po i jepet edhe lamtumira futbollistes shqiptare, e cila humbi jetën 10 ditë më parë në liqenin e Komos në Itali.
Në fillim u dyshua se futbollistja kishte humbur jetën për shkak të një sulmi në zemër, por prokurori i Comos, Nicola Piacente ka hedhur poshtë këto dyshime, teksa raporti i parë mjekësor i vdekjes së 24-vjeçarjes tregon se shqiptarja kishte asfiksi akute.
Kjo ceremoni lamtumire po zhvillohet në një sallë sportesh në Worben të Kantonit të Bernës.
Në këtë ceremoni të organizuar nga Federata e Futbollit të Zvicrës kanë marrë pjesë mbi 500 persona, mes tyre familjarë, miq, kolegë dhe sportdashës. Mes tyre janë edhe bashkëlojtaret e Florijanës, të cilat kanë veshur fanellat e klubit YB, në shenjë kujtimi për lojtaren e ndjerë.
Janë mbajtur disa fjalë nga personalitete të ndryshme, nga familja dhe miqtë. Mes të tjerave një përfaqësues i federatës në fjalimin e tij lamtumirës theksoi:
“Është e vështirë të gjenden fjalët për atë që ka ndodhur. Por, për Florijanën si njeri nuk është e vështirë: ajo ka qenë një vajzë e qeshur, tolerante, e gatshme për të ndihmuar. Ka qenë një shembull, model. Të dashur prindër, ju mund të jeni me të vërtetë krenarë me të”.
Ceremonia sipas ritit islam mbahet nën drejtimin e një imami, ndërsa vetë varrimi do të bëhet pastaj në praninë e një rrethi të ngushtë familjar.
