POGRADEC
Detaje tronditëse vazhdojnë që të dalin në dritë për ngjarjen horror që ndodhi në Pogradec, ku Olsi Çekiçi i preu me thikë kokën, nënës së tij Firdes Çekiçi.
Mësohet se ka qenë një mesazh në telefonin e adoleshentes, që ka nxitur edhe sherrin në familje. Pasi Olsi Çekiçi i ka gjetur mbesës mesazhin, ka dashur ta vrasë atë. Familjarët kanë thënë se në këto momente ka ndërhyrë gjyshja, që donte të mbronte mbesën.
Kur situata ka agravuar, mbesa ka ikur nga banesa me shpejtësi me një biçikletë, ndërsa 44-vjeçari ka vrarë nënën e tij.
Një i afërm i viktimës ka deklaruar se Olsi Çekiçi ushtronte gjithmonë dhunë mbi nënën. Ajo kishte denoncuar këtë dhunë tek institucionet, por më pas ka tërhequr kallëzimet.
Po ashtu, i afërmi ka vlerësuar se institucionet duhet që të reagojnë dhe të mund të ndëshkohet edhe mjeku që ka firmosur për lirimin e 44-vjeçarit Çekiçi. Bëhet me dije se Olsi Çekiçi vuante nga ç’rregullime të shëndetit mendor.
Ai kishte qenë në burg në Itali, Greqi dhe në Belgjikë. Gjithashtu ka vuajtur dënimin në vendin tonë në burgun e Zaharisë dhe vetëm pak muaj më parë, është shtruar në spitalin psikiatrik të Elbasanit për t’u kuruar.
Olsi ishte i divorcuar, ushtronte dhunë edhe mbi vajzën e mitur, por pavarësisht denoncimeve të shumta, vazhdonte të ishte i lirë. Ai ishte aktiv edhe në rrjetet sociale, ndërsa adhuronte Dua Lipën.
