Hidhet shorti në gjykatën e posaçme të Apelit për të përcaktuar trupën gjykuese që do të vlerësojë masat e sigurisë për gjyqtaren Enkeleida Hoxha, mjekun Edvin Prifti dhe personat e tjerë të arrestuar.
Kryesuese e trupës së gjykimit do të jetë Nertila Kosova, ndërsa anëtarë do të jenë Dhimitër Lara e Sokol Binaj. Gjyqi pritet të zhvillohet më 2 mars në orën 11:00.
Falë hetimeve të këtij procedimi u bë e mundur të evidentohej një skemë e mirëfilltë kriminale, sipas së cilës persona të dënuar, që vuanin dënimin në Burgun e Fushë–Krujës përfitonin ulje dënimi kundrejt dhënies së përfitimit të parregullt.
Edvin Prifti ra në pranga pas hetimeve të SPAK për korrupsionin me lirimet nga burgjet në gjykatën e Krujës ku u arrestua edhe gjyqtarja Enkelejda Hoxha.
Prifti kishte komunikuar me sekretaren e Gjykatës Krujë, ku kjo e fundit i kërkonte favor për të asistuar në operacionin e nënës së saj. Mjeku Prifti akuzohet për korrupsion pasiv dhe pastrim parash.
Ndërsa gjyqtarja Hoxha u arrestua për korrupsion, pasi ka liruar nga burgu disa persona me të shkuar kriminale.
Të dënuarit kujdeseshin fillimisht që si mbrojtës të tyre të zgjidhnin avokatin Aldo Tabaku dhe ky i fundit falë marrëdhënies që kishte krijuar me gjyqtaren Enkeleida Hoxha, mundësonte që të dënuarit të përfitonin uljen e dënimit, kundrejt shumave të parave të dhëna si përfitim i parregullt.
Bashkë me të në pranga ranë avokati Aldo Tabaku që përfaqësonte të dënuarit dhe sekretarja gjyqësore Emanuela Mallkuçi.
