Avokati Redi Ramaj ka deklaruar se familja e Martin Canit ka nisur një hetim paralel për ngjarjen tragjike, ku humbi jetën 14-vjeçari, për të hedhur dritë mbi konfuzionin që ka shoqëruar hetimin nga ana e institucioneve.
Ai ka theksuar se, përveç grumbullimit të dëshmive, ka nisur që nga data 27 nëntor kërkesat për marrjen e dokumenteve shtetërore lidhur me rastin. Megjithatë, ai thekson se dosja e ngjarjes ende nuk është dorëzuar zyrtarisht në duar të tij.
Në një intervistë për Top Channel, Ramaj ka shprehur shqetësimin se ende janë në fazën e parë të hetimit dhe kjo gjendje nuk është normale.
Ai ka theksuar se hetimi duhet të zbardhë jo vetëm ngjarjen e asaj dite, por edhe të zbulojë nëse kemi të bëjmë me një konflikt mes fëmijësh që çoi në fatalitet apo ka pasur pjesëmarrje të personave të tjerë të bashkëmoshatarë.
Avokati ka shtuar se shumë persona që kanë ardhur për ngushëllim dhe që mund të kenë dijeni për të vërtetat e ngjarjes nuk janë pyetur ende nga autoritetet përkatëse.
Ai gjithashtu ka kërkuar që të bëhet e mundur marrja e ekspertizës mjeko-ligjore dhe të sigurohen informacionet nga shkolla lidhur me zhvillimin e mësimit në ditën e ngjarjes dhe mundësinë e përfshirjes së fëmijëve të tjerë në incident.
Ramaj ka bërë të ditur se ka paraqitur një sërë kërkesash në institucionet përkatëse, përfshirë shkollën, dhe ka shprehur shqetësimin se deri tani nuk ka pasur asnjë lëvizje konkrete.
