Ditën e sotme Instituti i Shëndetëit Publik të Kosovës bëri me dije se nga mostrat e ujit të analizuara nga rajoni i Deçanit, u konstatua se në ujin e pijshëm janë gjetur baktere që mund të japin indikacion për kontamim.
Pas gjetjes së IKSHKP-së, kreu i komunës së Deçanit, Bashkim Ramosaj ka dalë në një deklaratë për mediat ku bëri me dije se kompania Rajonale e Ujësjellësit “Hidrodrini” që ka nën menaxhim ujin e pijshëm në Deçan, nuk do ta ketë më një angazhim të tillë.
Ramosaj u shpreh i lehtësuar për daljen në dritë të rezultatit, ndërsa shprehu keqardhje për koncentrimin e mediave në këtë çështje të caktuar gjatë kësaj kohe.
“Sot edhe unë edhe qytetarët ndihemi më të lehtësuar për faktin se doli një rezultat i cili hedh dritë mbi atë se çka është shkaktuar gjithë ky shqetësim, pikëpyetjet dhe hipotezat e teoritë konspirative e marrin epilogun. Më vjen keq që gjatë kësaj kohe se kemi pasur një koncetrum të medieve të caktuara”, ka thënë Ramosaj.
Ndër të tjera ai deklaroi se do të jetë i përkushtuar në mënyrë që kjo problematikë të gjejë një zgjidhje deri në fund.
Kujtojmë se më shumë se 1500 persona në komunën e Deçanit kërkuan ndihmë mjekësore me simptoma të njëjta të helmimit si të vjella apo diarre. Ndërkohë, ditën e sotme fluksi i pacientëve që iu drejtuan qendrës shëndetësore është ulur.
