Kryeministri Edi Rama ka reaguar për mbërritjen e tre helikopterëve që do të ndihmojnë në shuarjen e flakëve në vendin tonë- dy nga Holanda e një nga Çekia.
Në një postim në Facebook, Rama shkruan se njëri nga helikopterët ka kapacitet shumë të lartë, ndërsa shprehet se situata do të marrë një drejtim shumë pozitiv në orët dhe ditët e ardhshme, falë ndihmës së Mekanizmit të Mbrojtjes Civile të BE.
“Me 3 helikopterë të tjerë nga Holanda e Çekia – ndër të cilët njëri me kapacitet shumë të lartë ujëhedhës – falë Mekanizmit të Mbrojtjes Civile të BE për shuarjen e zjarreve në Europën Mesdhetare, situata e përmirësuar parashihet të marrë një drejtim shumë pozitiv në orët e ditët e ardhshme”, shkruan Rama.
Vendi ynë është përballur prej më shumë se 10 ditësh me zjarret, ndërsa Ministria e Mbrojtjes njoftoi ditën e sotme se janë shuar deri tani 163 vatra. Situata ka qenë kritike në gadishullin e Karaburunit, ku flakët ende nuk janë shuar, ndërsa puna vijon nga toka e nga ajri. Ndërkohë, beteja me zjarret është fituar në Gjirokastër, ku Ministria e Mbrojtjes njoftoi se nuk ka asnjë vatër active, edhe pse pasojat ishin të rënda. Kujtojmë se në Gjirokastër u shënua viktima e parë nga zjarret në vendin tonë, një 64-vjeçar i cili humbi jetën në fshatin “Asim Zeneli.
