Shqipëria është i vetmi vend në Ballkan që nuk e ka modernizuar hekurudhën, e cila sot përdoret nga një pjesë e vogël e popullsisë.
Plani për hekurudhën Tiranë-Durrës-Rinas, i cili ka qenë pjesë e një projekti për mallra kryesisht për të furnizuar kompanitë e zonës industriale, por edhe transportin në terminalet e Portit të Durrësit dhe atë të Rinasit, duket se është lënë sërish pezull.
Ndonëse në fund të vitit 2018 është hapur rruga për të përfituar kredinë e Bankës Europiane për Rindërtim dhe Zhvillim, duket se diçka ka çaluar sërish.
Kredia e dhënë nga BERZH për të financuar projektin u lançua në nëntor të vitit që lamë pas, por puna ende nuk ka nisur, pasi ministrja e Transportit dhe Infrastrukturës Belinda Balluku ka kualifikuar për tenderin një kompani që nuk plotëson kriteret teknike dhe ligjore, raporton “Gazeta Shqip”.
Balluku është përplasur me Bankën Europiane për Rindërtim dhe Zhvillim, pasi kjo e fundit e ka cilësuar tentativën e ministres për të kualifikuar kompaninë italiane si klienteliste dhe të dyshimtë.
Zv.ministri i Transporteve Artan Shkreli deklaroi 7 muaj më parë se në vitin 2020 do të nisnin punimet dhe në fillim garuan 25 kompani, pastaj ata u reduktuan në 10 e kjo ҫoi më pas në impasin që përplasi Ballukun me BERZH.
Kujtojmë se ky projekt përfshin rehabilitimin e linjës ekzistuese hekurudhore nga stacioni qendror hekurudhor Durrës deri në vendndodhjen e ardhshme të Terminalit të Transportit Publik të Tiranës (PTT) me gjatësi 34.2 km dhe, gjithashtu, për të ndërtuar një linjë të re hekurudhore që lidh linjën kryesore me Aeroportin e Rinasit (gjatësi 4.7 km.)
Kostoja totale e projektit llogaritet në 90.5 milionë euro, nga të cilat 36.9 milionë euro janë siguruar nga Banka Europiane për Rindërtim dhe Zhvillim, si dhe një grant nga Bashkimi Europian me 35.4 milionë lekë.
Sipas afateve të përcaktuara, kjo hekurudhë, e cila u fut në investimet e mëdha që premtoi kryeministri Edi Rama në fushatën zgjedhore të vitit 2017, duhet të mbyllej në nëntorin e vitit 2020.
Por, ne jemi në qershor dhe ende nuk ka nisur puna.
Mos ndoshta qeveria do mbledhi forcat dhe për 4 muaj do na surprizojë ?
