Kontrolli i Lartë i Shtetit ka zbuluar abuzimet e kryera nga ish-drejtori i AKU, Dritan Sejko.
Referuar kontrolleve të kryera nga KLSH, rezulton se Sejko ka shpenzuar karburant për makinën e tij, ndërsa qëndronte në zyrë, shkruan “Shqiptarja.com”.
Janë 14 raste në 2017-ën, gjatë të cilave Sejko ka qenë në zyrë, ndërsa në autorizimet e shërbimit përshkruhet sikur ka qenë në lëvizje.
“Nga auditimi i shpenzimeve të karburantit për vitin 2017, pas verifikimit të fletë udhëtimeve për mjetin me targë, TR0996L me të cilin ka kryer lëvizje kryesisht z. D. S. me detyrë Drejtori i Përgjithshëm i AKU, nisur nga shpeshtësia në kronologji dhe konsumi i karburantit u krye kryqëzim i daljeve së shkresave nga portokolli të firmosura nga drejtori i AKU-së dhe Autorizim Shërbimeve, ku rezultoi se: Në 39 raste në këto autorizime nuk evidentohen kërkesa për shërbim, apo dokumentime justifikuese e vërtetuese si (kupona tatimorë) të lëshuar nga furnizuesi që mund të vërtetonin furnizimin e mjetit përkatës sipas targës e datave të autorizimeve. Në 14 raste prej tyre është evidentuar se Drejtori i Përgjithshëm rezulton të ketë qenë prezent në institucion dhe jo në lëvizje apo destinacionin siç është përshkruar në autorizimet e shërbimit, kryesisht jashtë Tiranës dhe me largësi mbi 100 km”, thuhet në raport.
Për periudhën janar-tetor 2017, Sejko ka deklaruar 910 litra benzinë të harxhuara, të cilat janë të barabarta me 157.475 lek.
Në udhëzimin e Ministrisë së Financave, përcaktohet qartë se dokumentacioni quhet i rregullt, kur përshkruan me vërtetësi veprimin, ngjarjen, datën, vendin e kryerjes, objektin, personat që kanë urdhëruar dhe ekzekutuar veprimin dhe të gjithë të dhënat e nevojshme që i japin dokumentit forcën e një prove ligjore dhe administrative.
Gjithashtu dokumentet duhet të jenë pa korrigjime, harresa, numërim të dyfishtë apo mashtrime.
