Ish-deputeti Halit Valteri është paraqitur këtë të premte në Gjykatën e Posaçme për të dhënë dëshmi në lidhje me atentatin e ndodhur më 1 nëntor 2019 ndaj ish-prokurorit Arjan Ndoja, pranë mbikalimit të Shkozetit në autostradën Tiranë-Durrës.
Valteri është thirrur si dëshmitar në procesin penal që po zhvillohet ndaj Plarent Dervishit dhe Julian Meçes, të dy të akuzuar për atentatin ku mbeti i vrarë shoferi i prokurorit, Andi Maloku, ndërsa vetë Ndoja dhe pasagjeri tjetër, Aleksandër Laho – i njohur ndryshe si ‘Rrumi i Shijakut’ – mbetën të plagosur.
Thirrja e ish-deputetit në këtë fazë të hetimeve lidhet me deklaratat e bëra prej tij në vitin 2020, kur në cilësinë e deputetit të opozitës në atë kohë, publikoi në Kuvend një video ku pretendohej se shfaqeshin autorët e dyshuar të atentatit. Pas publikimit të videos, Valteri u thirr nga SPAK dhe dha dëshmi për rreth dy orë para prokurorit Altin Dumani.
“Kam dhënë deponimin tim pranë prokurorit Altin Dumani. Nuk na e mbyllën gojën, por do të zbatojmë ligjin. Deklaratat që kam bërë në Kuvend dhe në media i qëndroj”, deklaroi Valteri në atë kohë, duke lënë të hapur mundësinë që të thirrej sërish.
Ndërkohë, në orët në vijim pritet të ketë më shumë informacion lidhur me dëshminë që Valteri ka dhënë këtë herë dhe nëse ajo do të ketë ndikim në zbardhjen e plotë të ngjarjes që tronditi opinionin publik në fund të vitit 2019.
Kujtojmë se Arjan Ndoja, aktualisht i përfshirë politikisht si kandidat i Sali Berishës në qarkun e Durrësit, është rikthyer në skenën publike, duke marrë mandat si deputet në shtator të vitit 2025.
