Detaje të reja janë zbuluar nga ngjarja e së martës në fshatin Metoq të Sarandës, ku 49-vjeçarja Elvira Tahiraj është arrestuar për vrasjen e burrit të saj, Llazar Tahiraj.
Ajo ka pranuar krimin gjatë marrjes në pyetje nga policia dhe ka deklaruar se ishte ajo që e vrau bashkëshortin.
Elvira ka treguar se kishte pasur probleme të shëndetit mendor dhe ka pohuar se kishte tentuar ta vriste edhe më parë burrin e saj, por nuk ka dhënë një arsye të qartë për veprimin e saj.
Ngjarja e rëndë ka ndodhur rreth orës 08:00 të mëngjesit, kur vajza e çiftit gjeti babain e saj të pajetë dhe në pellg gjaku në shtratin e tij. Ajo ka kërkuar nënën e saj në shtëpi dhe e ka gjetur atë tek dera e jashtme.
Vajza ka njoftuar motrën dhe më pas ka lajmëruar policinë. Sipas një komshiu, Elvira kishte qenë tek dera e shtëpisë rreth orës 04:00 të mëngjesit dhe nuk kishte reaguar kur ai kaloi pranë saj.
Mjeku ligjor ka konfirmuar se viktima ka marrë goditje të rënda në kokë dhe ka pasur rrjedhje të shumta gjaku. Trupi i viktimës, Llazar Tahiraj, është dërguar për ekzaminim në Mjekësinë Ligjore në Tiranë.
Prokurorja Esmeranda Basho ka vazhduar hetimet dhe ka vendosur që Elvira Tahiraj të dalë për masë sigurimi në Gjykatë të enjten.
Policia ka konfirmuar arrestimin e Elvira Tahiraj për vrasjen e bashkëshortit të saj me sëpatë dhe e ka akuzuar për veprën penale “Vrasja për shkak të marrëdhënieve familjare”.
