Paketa “Anti-shpifje” e propozuar nga kryeministri Edi Rama është kundërshtuar fortë edhe nga Bashkimi Europian.
Komisionerja për të Drejtat e Njeriut në Këshillin e Europës, Dunja Mijatovic, ka shprehur shqetësimin e saj për paketën, që pritet të kalojë nesër në Kuvend.
Ajo ka kërkuar ndërhyrje urgjente për përmirësimin e saj. Sipas Miajtovic, disa dispozita nuk janë në përputhje me standardet ndërkombëtare për të të drejtat e njeriut, që mbrojnë lirinë e shprehjes dhe të mediave.
“Jam shumë e shqetësuar të mësoj se këtë javë Parlamenti shqiptar vazhdoi me shqyrtimin e dy projekt-ligjeve, të njohura si “paketa anti-shpifje”. Këto ligje kanë nevojë urgjente për përmirësim. Disa dispozita nuk janë në përputhje me standardet ndërkombëtare dhe evropiane për të drejtat e njeriut që mbrojnë lirinë e shprehjes dhe lirinë e medieve”, thuhet në reagim.
Komisionerja thekson, se bllokimi i faqeve online pa vendim gjykate është goditje e fortë për lirinë e shprehjes.
“Unë jam veçanërisht e shqetësuar që kompetencat diskrecionale që u janë dhënë organeve rregullatore, mundësia e vendosjes së gjobave të tepërta dhe bllokimi i faqeve të internetit të mediave pa një vendim gjyqësor, si dhe prezantimi i rregullimit shtetëror të mediave në internet, mund të sjellin një goditje të fortë për lirinë e shprehjes dhe liria e mediave në vend”, vijon reagimi.
Ndërkohë anëtari i Komisionit të Jashtëm në Parlamentin Europian, David Lega, ka paralajmëruar se Shqipëria rrezikon presidencën e OSBE.
