Gjykata e Posaçme ka konfirmuar masat e sigurisë për 21 të dyshuarit në dosjen e SPAK për bandën e Suel Çelës. Masat e sigurisë për 14 anëtarë të grupit janë lënë në fuqi, ndërsa për avokaten Blerina Beqiri është ndryshuar nga arrest shtëpie në detyrim paraqitje.
Po ashtu, gazetarët Elton Qyno dhe Artan Hoxha do të mbeten nën masën “detyrim paraqitje.”
SPAK ka zbardhur hetimin ndaj grupit kriminal të drejtuar nga Suel Çela, i cili ishte i përfshirë në trafikun e kokainës nga Amerika Latine në Europë, vrasje të mbetura në tentativë dhe përpjekje për të korruptuar funksionarë.
Hetimi ka zbuluar përfshirjen e anëtarëve të grupit, si Mario Çela, Bujar Shega dhe Klaus Matishi, në aktivitete të paligjshme, duke përfshirë tentativën e trafikimit të 930 kg kokainë dhe 466 kg të tjera.
Gjithashtu, SPAK akuzon Suel Çelën për përpjekje për të manipuluar opinionin publik dhe keqinformuar përmes bashkëpunimit me gazetarët Qyno dhe Hoxha, përfitime nga të cilët janë të lidhura me shpërndarjen e informacionit të pavërtetë. Hetimi për këtë çështje vijon.
