Rreth 20 persona me origjinë shqiptare u arrestuan midis shkurtit dhe fillimit të korrikut në Francë dhe Shqipëri, të gjithë të dyshuar për pjesëmarrje në trafik ndërkombëtar droge. Organizata e tyre kontrollonte trafikun e drogës në rajonin Auverge-Rhone-Alpes.
“Është një rrjet në shkallë të gjerë. Për këto importe kërkohej një bazë shumë e rëndësishme financiare. Më pas paratë kthehen në Shqipëri,”- tha një burim i afërt me çështjen për CNEWS. Sipas medias së huaj, drejtuesi i rrjetit ishte i vendosur në Holandë nga ku importonte dhe drogën për në Francë.
Personi i dyshuar si “koka” e grupit u arrestua në Shqipëri bashkë me dy bashkëpunëtorët e tij gjatë një operacioni të zhvilluar nga data 1-3 korrik. Jo më pak se 150 policë dhe xhandarë lokalë nga SR e Lionit u mobilizuan për këtë operacion. Por emri i tij nuk është bërë me dije. Një anëtar i katërt i këtij rrjeti u arrestua në shkurt teksa ndodhej në Francë, ku dyshohet se ka vepruar si ndërmjetës mes porositësit dhe dërgesave me seli në Villeurbanne. I njëjti person dyshohet se ka menaxhuar paralelisht një tjetër rrjet importi heroine dhe kokaine.
Pas arrestimit, ai u kthye në Shqipëri, ku kërkohej të vuante dënimin me 16 vjet burg për trafikim qeniesh njerëzore dhe trafikim të të miturve.
Kulmi i këtyre hetimeve të nisura në verën e vitit 2022 solli çmontimin e më shumë se 10 bazave të drogës në rajonin Auvergne-Rhone-Alpes por edhe konfiskimin e 100 mijë euro para të thata dhe 18 automjetesh. Në Francë u sekuestruan më shumë se 10 kg kokainë dhe heroinë nga hetuesit si dhe 82 kg përzierës, të cilat nëse do të shiteshin, kapnin vlerën e 800 mijë eurove.
