Skandali i publikuar në emisionin “Stop” mbrëmjen e djeshme ku gjyqtari Roland Hysi ka kërkuar raporte seksuale me një nënë që kërkonte kujdestarinë e vajzës, duket se ka marrë një drejtim.
Policia e Tiranës në bashkëpunim me policinë e Fierit kanë nxjerrë një urdhër arresti për gjyqtarin dhe psikologen që ishin pjesë e kamërës së fshehtë dhe kërkonin rryshfet për të mbyllur çështjen.
Tashmë i janë vendosur prangat Roland Hysit me detyrë gjyqtar në Gjykatën e Fierit si dhe Elona Mecanit me detyrë psikologe, pranë Gjykatës së Shkallës së Parë Fier.
Momentalisht Hysi dhe Mecani janë të ndaluar në Drejtorinë Vendore të Policisë Tiranë.
Njoftimi i plotë
Drejtoria Hetimore Qendrore në bashkëpunim me Drejtorinë Vendore të Policisë Fier dhe Tiranë kryen ekzekutimet e vendimeve të Gjykatës së Shkallës së Parë për Krime të Rënda Tiranë Nr.5, datë 09.01.2019 e cila ka vendosur masën e sigurisë “Arrest me burg” për shtetasit:
– Rolad Hysi , 50 vjeç, banues në Tiranë, me detyrë gjyqtar në Gjykatën e Shkallës së Parë Fier;
– Elona Mecani, 28 vjeçe, banuese në Fier, me detyrë psikologe, pranë Gjykatës së Shkallës së Parë Fier.
Gjykata ka vendosur masën e sigurisë “Arrest me burg” për veprat penale “Korrupsioni pasiv i gjyqtarëve prokurorëve dhe funksionarëve të tjerë të organeve të drejtesisë” dhe “Ushtrimi i ndikimit të paligjishëm të personave që ushtrojnë funksione publike”.
Ata ndodhen të ndaluar në Drejtorinë Vendore të Policisë Tiranë.
