Gjykata Kushtetuese e Maqedonisë së Veriut nuk mori vendim sot, por vendosi të mbajë një seancë përgatitore për Ligjin e Përdorimit të Gjuhëve, ku do të marrin pjesë ekspertë dhe përfaqësues të partive politike për të paraqitur argumentet e tyre.
Propozimi u bë nga gjykatësja Elizabeta Dukovska, por ende nuk dihet data e seancës.
Në seancën e sotme munguan gjykatësit shqiptarë Osman Kadriu dhe Naser Ajdari, ndërsa gjykatësi Fatmir Skender u largua pasi nuk u pranua propozimi i tij për anulimin e seancës. Forca të shumta policore rrethuan Gjykatën, ndërkohë që BDI-ja kishte ngritur një “roje për gjuhën” përpara gjykatës për të mbrojtur Ligjin për Gjuhët.
Ligji për përdorimin e gjuhës shqipe, miratuar në vitin 2018, parashikon përdorimin e zgjeruar të gjuhës shqipe në procese gjyqësore, bankënota dhe uniforma policore. Zëvendëskryeministri Izet Mexhiti theksoi se ligji nuk do të preket, duke u shprehur se dokumentet e Gjykatës Kushtetuese e vërtetojnë këtë. BDI-ja ka shqetësime se ndryshimet në nenin 23 mund të rrezikojnë zbatimin e ligjit.
