Gjykata Kushtetuese do të shqyrtojë më 18 shkurt ankimin e ish-zv. kryeministrit Arben Ahmetaj kundër sekuestrimit të pronave dhe llogarive bankare të tij.
Ahmetaj kërkon rrëzimin e masave të sekuestrimit, duke argumentuar se ato janë vendosur në kundërshtim me të drejtat e tij kushtetuese.
Më parë, Gjykata Kushtetuese ka refuzuar kërkesat e familjarëve të Ahmetajt për kthimin e pronave të sekuestruara, duke konfirmuar se sekuestrimi ka qenë në përputhje me ligjin dhe nuk ka shkelur të drejtat e tyre.
Ahmetaj është shpallur në arrati që nga korriku i vitit 2023 dhe akuzohet për “Pastrim parash”, “Fshehje të pasurisë” dhe “Korrupsion pasiv”.
Dyshohet se gjatë kohës që ka ushtruar funksionin si ministër, ai ka ndihmuar sipërmarrësit të lidhin kontrata koncesionare.
Për këtë arsye, ndaj tij ka një hetim pasuror dhe janë sekuestruar disa prona dhe llogari bankare.
Në korrik 2023, organi i akuzës lëshoi urdhër-arresti dhe shpalli Ahmetajn në kërkim ndërkombëtar, ndërsa në mars të vitit 2024 i komunikoi akuzat përmes avokatit të tij.
