Gjykata e Lartë do të vendosë sot mbi kërkesën e Ilir Metës për ndryshimin e masës së sigurisë “arrest me burg”.
Vendimi do të merret në dhomë këshillimi nga gjyqtarët Ilir Panda, Albana Boksi dhe Medi Bici, të cilët do të shqyrtojnë gjithashtu rekursin e deputetes Monika Kryemadhi.
Meta, i cili ndodhet në paraburgimin “Jordan Misja” që prej tetorit 2024, argumenton se si drejtues i forcës së dytë opozitare dhe në prag të zgjedhjeve të 11 majit, duhet të lirohet nga arresti.
Ai përballet me akuza nga SPAK për korrupsion, pastrim parash dhe fshehje pasurie, në lidhje me çështjet CEZ-DIA, lobimin e ish-LSI në SHBA dhe shpenzimet familjare.
Masa e arrestit ndaj tij është konfirmuar më herët si nga Gjykata e Posaçme e Shkallës së Parë, ashtu edhe nga Apeli. Ndërkohë, Kryemadhi, e cila është nën masën e “detyrimit për paraqitje”, ka paraqitur rekursin e saj duke e cilësuar vendimin të padrejtë.
