Presidenti i Kosovës, Hashim Thaçi do të përballet me akuza zyrtare nga Prokuroria Speciale. Mediat në Kosovë bëjnë me dije se në 24 prill 2020, Zyra e Prokurorit të Specializuar u paraqiti Dhomave të Specializuara të Kosovës një aktakuzë me dhjetë pika për shqyrtim prej Gjykatës, ku Presidenti Hashim Thaçi, kreu i Partisë Demokratike të Kosovës, Kadri Veseli dhe të tjerë akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura.
Më tej shtohet se Thaçi dhe bashkëpunëtorët e tij, janë përgjegjës për 100 vrasje të paligjshme gjatë luftës. Sipas dokumentit të Prokurosisë Speciale krimet e paraqitura në Aktakuzë përfshijnë qindra viktima të identifikuara shqiptarë, serbë dhe romë të Kosovës dhe kundërshtarë politikë.
“Aktakuza është vetëm një padi penale e cila është rezultat i një hetimi të gjatë dhe dëshmon vendosmërinë e ZPS-së se mund t’i provojë të gjitha akuzat jashtë dyshimit të arsyeshëm. Një gjykatës i procedurës paraprake i DHSK-së është duke e shqyrtuar Aktakuzën për të vendosur nëse do t’i konfirmojë akuzat.Prokurori i Specializuar e gjykon të domosdoshëm nxjerrjen e këtij njoftimi publik për akuzat, për shkak të përpjekjeve të përsëritura të Hashim THAÇIT dhe Kadri VESELIT për pengimin dhe sabotimin e punës së DHSK-së. Besohet se z. THAÇI dhe z. VESELI kanë ndërmarrë në fshehtësi një fushatë për shfuqizimin e ligjit që krijoi Gjykatën dhe ndryshe kanë penguar punën e Gjykatës në orvatje për t’i bishtnuar drejtësisë, Nëpërmjet këtyre veprimeve, z. THAÇI dhe z. VESELI kanë vënë interesat e tyre vetjake mbi viktimat e krimeve të tyre, sundimin e ligjit dhe popullin e Kosovës”, shtohet në njoftim.
Prokuroria Speciale në Kosovë prej kohësh po fuknsionon, por puna e saj është penguar shumë herë nga politika. Në vitin 2017, ku kjo prokurori do të niste punën, Hashim Thaçi, Kadri Veseli dhe Ramush Haradinaj tentuan që të shfuqizonin ligjin që e mbante atë në këmbë.
Ata kërkuan që të bëhej një ligj në Kuvendin e Kosovës, që nuk njihte Specialen, por pas presionit ndërkombëtar u tërhoqën. Nisma e tyre u kundërshtua nga Lidhja Demokratike e Kosovës dhe Lëvizja Vetëvendosje, të dy parti në opozitë në atë kohë. Ndëkrombëtarët kanë kërkuar me ngulm për Specialja të funksionojë, por politika në vend nuk e do një gjë të tillë.
Kjo prokurori do ketë subjekt të gjithë politikanët dhe funksionarë të tjerë, të cilët kanë qenë aktiv gjatë luftës, pasi dyshohet të kenë kryer krime kundër njerëzimit që nuk njihen as nga ligjet e luftës. Haradinaj dhe Veseli janë intervistuar si të dyshuar, por kundër tyre nuk u ngrit ndonjë akuzë zyrtare.
