Në GJKKO do të zhvillohet sot seanca gjyqësore për kryebashkiakun e Tiranës, Erion Veliaj.
Objekt i shqyrtimit do të jetë kërkesa e paraqitur nga mbrojtja për ndryshimin e masës së sigurisë ndaj tij.
Seanca ishte parashikuar fillimisht për më 16 prill, por u shty me kërkesë të avokatëve të Veliajt, për shkak të nevojës për t’u njohur me dosjen hetimore dy mujore të dorëzuar nga SPAK.
Erion Veliaj u arrestua më 10 shkurt, në ambientet e Bashkisë Tiranë, si i dyshuar për “korrupsion pasiv të funksionarëve të lartë shtetërorë ose të zgjedhurve vendorë”, vepër e kryer në bashkëpunim në nëntë raste, si dhe për “pastrimin e produkteve të veprës penale ose veprimtarisë kriminale”. Ndaj bashkëshortes së tij, Ajola Xoxa, është caktuar masa e sigurisë “detyrim paraqitje”.
Sipas SPAK, të dhënat e mbledhura deri në këtë fazë të hetimit tregojnë se Veliaj dhe bashkëshortja e tij kanë ndërtuar një mekanizëm të organizuar për të përfituar në mënyrë të parregullt nga fondet publike të Bashkisë Tiranë. Sipas prokurorisë, përmes veprimeve të fshehura dhe të paligjshme, qëllimi ka qenë përfitimi personal dhe pasurimi i familjes Veliaj.
