Gjykata e Posaçme refuzoi kërkesën e Fredi Belerit për dhënien e një leje dalje që ky i fundit të mund të kryejë betimin në mbledhjen e Këshillit Bashkiak të Himarës që do të mbahet nesër. Ministria e Jashtme greke ka është shprehur se ky refuzim tregon pa asnjë dyshim, se qëllimi i autoriteteve shqiptare është ta privojnë Belerin nga marrja e detyrës. Kjo pasi Beleri ndonëse është shpallur fitues në zgjedhjet e 14 majit, nuk mund të marrë postin nëse nuk kryen betimin para këshillit bashkiak, e në këtë mënyrë kompetencat e kryetarit duke qenë se Beleri është në burg , i kalojnë atij aktual, Jorgo Goros të Partisë Socialiste.
‘Kërkesa e kryebashkiakut të zgjedhur të Himarës, Fredi Beleris, për të marrë një leje të posaçme, në mënyrë që të jetë pjesëmarrës nesër në mbledhjen e parë të Këshillit të ri Bashkiak, si dhe të bëjë betimin dhe të marrë zyrtarisht detyrën, u rrëzua sot. Ky refuzim tregon tani, pa asnjë dyshim, se qëllimi i autoriteteve shqiptare është ta privojnë atë, pa një dënim përfundimtar dhe pa u akuzuar, nga detyra e kryetarit të Bashkisë, në të cilën ai u zgjodh në mënyrë demokratike nga qytetarët e zonës. Si kandidate për anëtarësim në familjen europiane, Shqipëria duhet të respektojë shtetin e së drejtës dhe të drejtën e pafajësisë deri në zhvillimin e gjyqit.’- thuhet në reagimin e ministrisë së Jashtme greke.
